සුගතෙ

"සෝමෙ අයියේ වරෝ විගහට විහාර ගේ කඩලා"

ඕප දූපයට වඩා ජීවිතයක් නොතිබූ ගුණදාස මාම මෙදා පාර කිව්ව දේට මගෙ හිත විතරක් නෙමෙයි ගතත් වෙවුලුම් දුන්නෙ ඉබේටම වගේ...

"මොකාද යකෝ ඔය නොහොබිනා වැඩේ කරපු අසමජ්ජාතියා"

අප්පච්චිගෙ කටහඬේ තිබුණෙ කියාගන්ඩ බැරි තරමෙ ආවේගයක්...සිරියා නැන්දගෙ දූට මම කොලොප්පම් කරපු දවසටත් වඩා අප්පච්චිට තරහ ගිහිල්ලා..

"මොකක් කිව්වා"

ආච්චිටත් කතාවට එක්කහු වෙන්ඩ උවමනාවක් තිබුණත් විගහට බැනියමක් දාගත්ත අප්පච්චි ගුණදාස මාම එක්ක පන්සල පැත්තට ගියේ මහා හදිස්සියකින්..

"උඹ මොකෝ ලමිස්සි වගේ ගෙට වෙලා ඉන්නෙ...ගොහින් බලල වරෙන් මොකක්ද උනේ කියලවත්"

අපෙ අම්මගෙ වචන ටික ඇහුන සුනන්ගුවෙන් මම හිටියෙ පන්සල් වත්තෙ..

විභාගෙට තියෙන්නෙ දවස් විස්සක් විතර..රජයෙ ලිපිකරුවෙක් උන අප්පච්චිට මගෙ ඉගෙනීම ගෙන ලොකු උනන්දුවක් තිබුණත් කවදාවත් ඉස්කෝලෙ ගිහින් නැති අපෙ අම්මට නම් ඉගෙනීමෙ මහ ලොකු වැදගැම්මක් පෙණුනෙම නෑ..

පන්සල් වත්ත එකම හිස් ගොඩක්..තැන තැන එක්කහු වෙච්චි මිනිස්සු කතා කරනවා නෙමෙයි කෑ ගහනවා...හරියට බදාදා පොල වගේ.අපෙ අප්පච්චි නම් හාමුදුරුවෝ බැහැ දකින්ඩ ගිහින් ඇති..

සුදා එක්ක විජේ වැට අයිනෙ එඬරු බෝල පිඹ පිඹ ඉන්නවා..උන් දෙන්න තමයි මගෙ පන්තියේ හොඳම යාළුවෝ..ආහ් තව එකෙක් ඉන්නවා..නෑ හිටියා..සුගතෙ..ඌ තමයි අපෙ පන්තියේ හිටිය දක්ෂම එකා..සුගතෙ පොඩි කාලෙම උගෙ අප්පච්චි වෙන ගෑණියෙක් එක්ක යන්ඩ ගියා..සිරියා නැන්දත් මාස හයකට විතර උඩදි නයෙක් ගහල මැරිල ගියා...දැන් සුගතෙ ඉන්නෙ සීයා ගාව..රා මදින්ඩ සීය එක්ක යනව මිසක් විභාගෙට දැම්මත් ආයෙ සුගතෙ ඉස්කෝලෙ ආවෙ නෑ...ආයෙ ඉගෙන ගන්ඩ තරම් හයියක් වත්කමක් සුගතෙට තිබුණෙ නෑ..උට උදව් කරන්ඩ තරම් හයියක් අපිට තිබුණෙත් නෑ..පව් අසරණය..

පොල් ගහකට හේත්තු වෙලා හීන ලෝකෙක හිටිය මගෙ දැහැන බින්ඳෙ අප්පච්චිගෙ කටහඬ

"වර යන්ඩ ගෙදර,උඹටත් පොතෙන් පිට පැනල ඉන්ඩ තියෙනවනම් ඒට වඩා වෙන දෙයක් නෑ නේද"

අප්පච්චි ඇහුවෙ ප්රශ්නයක් උනත් ඒකට උත්තරයක් නම් බලාපොරොත්තු උනේ නෑ.

"මොකද අප්පච්චි වෙලා තියෙන්නෙ"

"පින් කැටේ කඩලා බන්..දෙදාහක් විතර තියෙන්ට ඇති කියල කියන්නෙ..අනේ මොකා උනත් හෙණ ගහනව උට"

"හ්ම්"

ඇත්තටම මොකා කරපු වැඩක්ද කියල මට නම් හිතා ගන්ඩ බෑ..අපෙ ගමේ පන්සල කඩන හොරෙක් නම් ඉන්ඩ විදියක් නෑ...ලොකු හාමුදුරුවන්ට ඔක්කොම බයයි ගරු කරනවා...

දවස් දහයක් විතර ගෙවෙන්ඩ ඇති..හොරෙක් නම් අහු උණේ නෑ..මිනිස්සුන්ටත් ඒ සිද්ධිය ටිකෙන් ටික අමතක උනා..ඒ අස්සෙ අප්පච්චි හම්බෙන්ඩ දවසක ආව ගුරුන්නාන්සෙ මාම ගුරුකමක් ගෙන කතා වෙනවා මට ඇහුණෙ යාන්තමට වගේ..

"ආයෙ දෙකක් නෑ මහත්තයො..සතියක් යන්ට කලින් හොරා වල කජ්ජ ගහනවා හිටි හැටියෙ ඕන් බලහන්කො"

අප්පච්චිත් ගුරු කමට උඩින්ම කැමති උනු විත්තිය මට කතා බහෙන්ම තේරුම් ගියා..ඇත්තටම ඔහොම දෙයක් කරපු එකෙක් මැරෙන්ඩම ඕනැ..මටත් හිතුණෙ ඒ ටිකමයි..

හරියටම ගෙවුණෙ දවස් තුනයි.....වැඩ ඇරිල ගෙදරට ගොඩ වෙන අප්පච්චිගෙ මූණ අඳුරු වෙලා..මහ හයියෙන් හුස්ම ගන්න අප්පච්චි හාන්සි පුටුවෙ වාඩි උනා..

"වතුර එකක් ගෙනෙන්කො බොන්ඩ"

මම වතුර එකක් ගිහින් දුන්නෙ විදුලි වේගෙන්..අප්පච්චි වතුර වීදුරුව බීල ඉවර කරන්ඩ මහා වෙලාවක් ගියා වගෙයි දැනුණෙ..

"පින් කැටේ කැඩුව උන් මක බෑවිලා"

"ඒ මොක්කුද"

ඔක්කොටම කලියෙන් ඇහුවෙ ආච්චි..

"ගුණදාසයා මැරිලා..උගෙ ගෙදර තිබිලා එකදාස් පන්සීයක් හම්බෙලාලු..අසමජ්ජාතියා ඕකමනෙ මට කිව්වෙත් පන්සල කඩල කියල..අජාසත්තයාට හොඳම වැඩේ.."

අප්පච්චි කියෝගෙන යනව..ඒත් එතකොට අනිත් උන්..

"අප්පච්චි එතකොට අනිත් උන්"

"අනිත් උන් නෙමේ...එකයි බන්...උඹලගෙ වයසෙ එකෙක්ලු..සුගතෙද මොකාදො උඹෙ පන්තියේ එකෙක්ලු..ඕක කරන දේවල් වලට වෙන්ඩැති අම්ම අප්පත් නැති උනේ"

අප්පච්චි කාමරේ පැත්තට ගියේ කලකිරුණු මූණකින්..

සුගතෙ හොඳ එකා...ඇයි ඌ පින් කැටේ කැඩුවෙ...මට ඒක හිතා ගන්ඩම බැරි උනා...ඒකට උත්තරේ මට ඊගාවින් දවසෙම හම්බුනා.....

"සුගතෙගෙ මිනිය තියන්ඩ පැල අස් කරද්දි අලුත් සුදු ඇඳුමක් හම්බෙලාලු.ටවුමෙ ටේලර් කඩේක බිල් කඩදාසියක් එක්ක..හයසීයක්ලු බිල එතෙන්ට"

මිනිස්සු කතා වෙනවා මට යාන්තමට වගේ ඇහුණා..

"සුගත් කොලුවා හයසීයයිලු අරන් තියෙන්නෙ...පස්සෙ එතෙන්ට ආව ගුණදාසයා ඉතුරු සල්ලි ඔක්කොම අරන් සීරුවට මාරු වෙලාලු"

මළ ගෙදර ගිහින් ආව අප්පච්චි දරා ගන්ඩ බැරි තරම් දුකකින් කියද්දි මට හිතුණෙ එක දෙයයි..

සුගතෙ හොඳ එකා.....

:::::::::::::::::::::::::::::::::::::::::::::::::::::::::සිමෙත් කවීජ::::::::::::::::::::::::::::::::::::::::::::::::::